Davao City – Posibleng nahadlok lamang ang Duterte administration nga may madiskubrehan si Vice-President Leni Robredo nga dili maayo sa kampanya kontra droga ug mabulgar kini maong gitangtang na lamang kini isip drug czar.
Nagtoo si Kalipunan ng Damayang Mahihirap (KADAMAY) Davao Focal Person Toto Bolcan nga posibleng may nasimhutan si Robredo nga pagpangabuso diha sa drug war ug nga dili buot sa gobyerno karon nga mogawas ang nasangpit nga sensitibong inpormasyon.
Segun ni Bolcan, ang bisan unsang impormasyon nga makuykoyan sa nataktak puwedeng gamiton batok sa Malacañang aron sa ingon, mohumot og samot ang bise-presidente ug maabante niini ang ambisyon sa 2022 presidential election.
Matud ni Bolcan,may kagahum ug katungod si Duterte nga motaktak sa mga appointed Cabinet members ilabi na kun wala na’y salig ang pamuno-nasud ngadto sa maong opisyal.
Nabantayan nga sa tulo ka semana ni Robredo isip drug czar, ang ginahimo niini daw halos pagsungag ug pagdaut or pag-discredit sa Duterte regime aron mugawas nga palpak ang giyera kontra droga sa gobyerno karong panahona.
Nasayangan si Bolcan sa kahigayonan nga mahibalik pag-usab ang maayong relasyon ingon man magkahiusa ang mga lideres sa Pilipinas sa ngalan sa kampanya kontra droga ug sa katawhang Pilipino.
Radyoman Joel Viray
