Davao City – Nagtoo si kanhi Diwalwal Barangay Captain Franco Tito nga wala pa mu-epekto ang isyu sa pagpasirado sa Kabus Padatuon (KAPA) Community Ministry International sa nagkataas nga trust rating ni Pres. Rodrigo Duterte.
Ang SWS nagpahigayon og survey sa 1,200 ka mga respondents sa tibuok nasud niadtong Hunyo 22 ug 26 ug migawas nga 80% sa mga Pilipino kun ‘8 out of 10 Filipinos surveyed’ nagpabiling adunay dakung pagsalig sa liderato ni Duterte itandi sa 66% niadtong bulan sa Marso kun sa unang quarter karong tuiga.
Segun ni Franco, nianang panahona, dili pa lamang dugay ang pagmando sa crackdown sa pamuno-nasud nagdto sa mga investment schemes sama sa KAPA, busa lantaw sa kanhi barangay official nga wala pa gayud mabati ang epekto sa sentimiyento sa mga tawo maong taas gihapon ang trust rating sa pangulo.
Dapat lamang nga magmaya kun maglipay sa karon ang pamuno-nasud tungod sa resulta sa survey nagpakita lang sa walay puas nga pagsalig sa kinabag-ang duot sa katawhang Pilipino ngadto kaniya.
Apan kung dili paminawon ang mga investors sa ilang panawagan nga tugtan maka-operate og balik ang mga investment firms partikular ang KAPA, hayan sa sunod survey mulagpak na gayud ang trust rating ni Duterte ug sa ubang mga opisyal sa kagamhanan karon.
RadyoMaN Joel Viray
