Davao City – Ibida ang mga legasiya sa Duterte administration ang lauman sa ika-upat nga State of the Nation Address (SONA) ni Presidente Rodrigo Duterte.
Kini ang gibutyag ni Presidential Communications Operations Office (PCOO) chief Sec. Martin Andanar atol sa interbyu kaniya sa tulumanong ‘Straight to the Point’ uban si RadyoMaN Misel Miral-Galve.
Sumala niini nga ilado na ang mga legasiya sa Duterte Regime nga mao ang Poverty Alleviation, Build Build Build Programs, ug Peace and Order.
Gani gikanayon ni Andanar nga panahon mahuman ug makab-ot ni Duterte ang maong mga plano, makunsidera na kining usa ka milestone sa Pilipinas sanglit masinatian na sa katawhan ang progreso sa nasud.
“Mao ni akong tawag nga gold standard and ang mosunod nga presidente ma-pressure ug magperform pag-ayo para malabwan pa ug para mas ma-improve atong kinabuhi after 2022,” segun niini.
Dugang sa PCOO chief nga ubay-ubay ang mga accomplishments sa presidente gani dili kini mag-igo sa gikatakdang adlaw rason nga magpahigayon usab og post SONA aron matuki ang mga di klarong punto sa maong aktibidad.
Karong Hulyo 22, 2019 ipahigayon ang ika-upat nga SONA sa presidente sa Batasang Pambansa sa Quezon City, Manila, Philippines.
RadyoMaN Jason Amisola
