Davao City – Ugmang adlawa Domingo, ang pamuno-nasud sa Pilipinas Pres. Rodrigo Duterte opisyal na nga molupad paingon sa nasud-Japan aron sugdan ang iyang tulo ka adlaw nga Working Visit.
Manukad dinhi mismo sa syudad nga iyang gi-alagaran sa kapin tulo ka dekada, ang pangulo inubanan sa mga miembro sa iyang official delegation mobiya aron pakigkitaan ang silingang nasud sa Asya kinsa adunay usaka lawom nga relasyon-diplomatikanhon sa atong nasud, ilabi na sa natad sa ekonomiya.
Sa iyang Departure Statement, gilaumang ilatag sa presidente ang tumong ug tuyo sa iyang latest official travel ug ang agenda sa iyang gikatakdang pakighimamat kang newly-reelected Japanese Prime Minister Shinzo Abe.
Gilauman usab nga sa maong panagtagbo sa duha ka mg Asian leaders, mahisgotan ang mga ‘critical issues’ sama sa tension karon diha sa Korean Peninsula nga naghatag ug dili ti-aw’ng kabalaka karon sa Asian Region ilabi na nga ilado ang duruha ka nasud nga kaalyados sa Estados Unidos.
Gawas pa niana, daku usab ang purohan nga tutukan ang gitawag nga ‘regional economic and security issues’ nga hagit sa duruha ka nasud sa modernong panahon ingon man sa entero ASEAN region.
Karong Martes, October 31 ang presidente motugpa pag-usab dinhi sa syudad sa Davao alang sa iyang paghibalik gikan sa Japan visit.
Gilauman usab nga sa ‘Todos Los Santos,’ igahin sa pangulo ang iyang panahon sa pagpahulay diin siya moduaw sa lubnganan sa iyang mga ginikanan sa may Wireless Cemetery, sila si former Gov. Vicente Duterte sa undivided Davao Province ug ang iladong Davaoweña civic leader-teacher ug presidential mother, Soledad ‘Nanay Soling’ Duterte.
RadyoMan June Duterte
