Davao City – Ubos sa 1987 constitution, obligado si Pres. Rodrigo Duterte nga musapubliko sa iyang matuod nga kahimtang sa panglawas aron ang nasud dili mabutang sa alanganin ug dili mabalaka ang katawhan.
Ang Section 12 Article 7 sa 1987 Philippine Constitution nagsulti nga ang publiko angay mahibawo sa matuod nga kahimtang sa panglawas sa pangulo ug kini dili angay ihilom ngadto sa katawhan.
Gani ang National Security Council sa gabinete ug ang hepe sa armadong kusog sa Pilipinas gimandoan sa balaud nga dili limdan ang katawhan kung ugaling nagbaton og seryoso nga sakit ang presidente.
Alang ni Ateneo De Manila University Political Science Professor Carmelle Abao ang panglawas sa pangulo seryoso nga hisgotanan sanglit may implikasyon kini sa iyang pagahimoon nga mga desisyon.
Human gipasiatab ni CPP-NPA-NDF Founding Chairman Jose Maria Sison nga na-coma ang Presidente, gisiyagit karon sa mga kritiko nga ipublikar ang medical record sa pamuno-nasud.
Hinoon, ang alegasyon ni Sison wala giundayunan sa Malacañang sa katarungan nga himsog kaayo ug walay diperensiya ang panglawas sa pamuno-nasud.
Busa alang ni Institute for Political and Electoral Reform Head Professor Ramon Casiple walay rason aron isapubliko ang medical record ni Pres. Duterte kung lagsik man lang kini.
Nagtoo si Casiple nga dili usab tipig-tipigan sa palasyo ang matuod nga estado sa panglawas sa pangulo ug angay lamang iyagyag kini ugaling maghambin man og balatian ang lider sa nasud gumikan sa national security implications niini.
RadyoMaN Joel Viray
