Davao City – Gikalipay sa mga nasunogan ang pamahaw nga gidalit sa team DXDC 621 RMN Davao pinaagi sa ‘DXDC Operation Tabang’ didto sa temporaryong gihiklingan sa mga residente sa covered court sa Brgy 23-C, Davao City.
Taliwala sa trahedya, mapasalamaton gihapon ang mga biktima gumikan sa pipila ka mga tabang nga nag abot ngadto kanila gikan sa sibyahanan, pribadong sektor ug sa gobyerno.
Gani gikatakdang itunol usab karong adlawa sa DXDC ang mga sinina ngadto sa mga nabiktima pinaagi sa pakigkoordinar sa maong barangay.
Sumala ni DXDC special projects head Misel Miral-Galve nga ang maong lakang subay sa gimugna nga RMN Foundation aron usab dali nga mapaabot ang mga tabang ngadto sa mga kaigsuunang apektado ba karon sa baha, sunog ug uban pang kalamidad.
Subay niini, gipanawagan kadtong buot pa muhatag sa ilang mga donasyon nga mamahimong ihatod lang sa 2nd Floor, San Vicente Building, Anda-Bonifacio Sts., Davao City diin asa nahimutang ang RMN station o mutawag sa contact number nga 227-4571.
Kahinumduman nga gibana-banaang ana sa 200-300 ka mga balay ang naugdaw kagahapon sa Purok-4 D Brgy. 23-C Isla Verde ning dakbayan diin sa karon padayon pang ginasuta sa otoridad ang hinungdan sa nahitabong insidente.
RadyoMaN Renz Barbarona
