Davao City – Dili masukod nga kalipay ang gibati sa mga nabiktima sa linog sa Digos City human nga gipaabot sa DXDC RMN Davao ang mga tabang nga gitunol sa sibyaan pinaagi sa RMN Foundation.
Sa Oplan Tabang nga gipahigayon sa DXDC karong adlawa, pahiyom ang misugat sa RMN Davao team taliwala sa problemang gi-atuabang sa kapin gatus nga mga evacuees sa Sitio Bandera nga temporaryong nagpuyo karon sa Brgy. Balabag sa Digos City.
Kinasingkasing nga gi-turn over ni Ptr. Leo Daugdaug, station manager sa DXDC ang mga hinabang alang sa nahisgutan.
“Ania mi karon aron pagpadangat aning mga relief goods o mga hinabang nga gipaabot pud sa kaigsoonan nato nga aduna poy malumong kasingkasing nga nakabati pud sa inyong sitwasyon diri,” saysay ni Ptr. Daugdaug.
Malipayon usab nga gidawat sa Local Government Unit (LGU) sa Brgy. Balabag, pinaagi ni Kagawad Nora Baloy ang maong mga tabang.
“Salamat kaayo. Salamat sa inyong tabang sa amoa. Bisan layo inyuha pero niari gyud mo diri. Dako gyud among pagpasalamat gikan sa barangay council sa Brgy. Balabag ug sa tanang katawhan. Daghang salamat gyud, daghang salamat!” pamahayag sa brgy. official.
Gawas sa tabang nga gipaabot, mihatud usab og kalingawan ug kasadya ang RMN team pinaagi sa mga padula ug pa-raffle alang sa tanan.
RadyoMaN Kirby Manzon
