Malampuson ang gihimung ‘launching’ sa PUV modernization dinhi sa dakbayan sa Butuan nga gipangunahan sa Land Transportation Franchising Regulatory Board (LTFRB) sulod sa Robinsons Place ning syudad sa Butuan, kagahapon.
Mitambong sa aktibidad si LTFRB Chairman Atty. Martin Delgra ug nipaabot kini sa pagpasalamat gumikan sa suportang gipakita sa kahugpungan sa transportasyon sa dakbayan sa Butuan ug Agusan del Norte sa modernization program ubos sa administrasyon ni Pang. Rodrigo Duterte.
Lauman nga karong adlawa magsugod na sa pagpamasada ang ubay-ubay nga unit sa E-Jeepney human gitagaan na ug provisional authority mga transport cooperative.
Mitambong usab sa launching sila si Agusan del Norte 2nd district Congw. Angel Amante – Matba, Board Member Erwin Dano, Butuan city Vice Mayor Joboy Aquino ug mga opisyal sa LTFRB Caraga sa pagpanguna ni Regional Director Ma. Cristina Cassion.
Subay niini gihagit ni Congw. Angel Amante- Matba ang kadagkoan sa kooperatiba nga tarungan pagdala ang pundo sulod sa ilang kahugpungan aron molambo pa ang sector transportasyon.
[image: ne jeep 3.jpg]
