TACLOBAN CITY – Ginsuspende han Office of the Ombudsman hi Guiuan, Eastern Samar Mayor Christopher Sheen Gonzales ngan lima nga local officials tungod han gin aaligar mayada irregular ha pag implementar han multi-million peso Yolanda recovery program.
Ha order han Ombudsman, hi Gonzales ngan igkasi mga respondents in suspendido ha sakob han unom (6) kabulan nga waray sweldo tungod han gin aaligar grave misconduct ngan gross neglect of duty nga ginkakaatubang nga reklamo han mga ini ha Ombudsman.
Naghatag na hin direktiba hi Interior and Local Government Secretary Eduardo Año nga ig-implement an order.
Ginsuspende gihapon hira municipal accountant Adrian Bernardo; municipal treasurer Felicisima Bernardo; Bids and Awards Committee members Arsenio Salamida, Esperanza Cortin, Danilo Colandog, Gilberto Labicante, Ma. Nenita Ecleo, ngan Felipe Padual; ngan BAC-Technical Working Group member Zosimo Macabasag.
An Guiuan in apil ha 171 local government units nga nadestroso han Super typhoon Yolanda dida han tuig 2013 ngan sakob ha Recovery Assistance on Yolanda (RAY) funds han DILG.
Gin-aprobaran han local government han Guiuan an P209 million public funds para han mga proyekto ha ilarom han RAYs 1 ngan 2 nga mayada P147.764 million nga mangangadto ga duha nga contractors.
An Pedro S. Labasbas Construction an nakakuha han RAY 1 dida han April 2014 para han pagpapa ayos han Guiuan municipal building ngan public market, samtang an RAY 2 naman in nakuha han EDG Americas Inc. dida han February 2015 para han pagpapa ayos han 89 nga pasilidad ha 60 nga component barangays.
Pero nakit-an han Field Investigation Bureau han Office of the Ombudsman nga an mga nasabi nga contractors in waray makapagpakita hin dokumento nga hira in technical, legal ngan financial competence nga makapot han mga proyekto.
Siring han Ombudsman, waray magtuman ha plano an EDG Americas Inc. para han pagpapa ayos han proyekto.
Matatanggal ha pwesto hi Gonzales pati na an iba nga respondents kun mapamatud-an han Ombudsman nga guilty hira ha mga nasabi nga reklamo.
