Davao City – Gipatuman karon ang hugot nga monitoring ug koordinasyon sa Eastern Mindanao Command kun Eastmincom ngadto sa ilang counterparts sa Western Mindanao ug ubang law enforcement units sama sa kapulisan alang sa seguridad dinhi sa Eastern Mindanao.
Subay kini sa nahitabong pagpamomba sa Jolo Cathedral sa Brgy. Walled City, Jolo, Sulu alas 8:15 kagahapon sa buntag diin asa nagpahigayon og misa niadtong tungora sa dihang mibusikad ang bomba sa makaduha ka higayon.
Sa report sa Wesmincom, miresulta sa pagkamatay sa kapin 25 ka mga sibilyan ug kapin 70 ang samaran sa nahitabong pagpamomba lakip naapil niini ang pipila ka mga sundalo.
Samtang gitino sa Eastmincom nga bisan walay nadawat nga direktang hulga bahin sa seguridad nagpabalin gihapon ang ilang taas nga alerto.
Subay niini, giawhag sa otoridad ang publiko nga magmaigmaton ug magbantay usab sa palibot gani og adunay mamatikdang kadudahang butang o tawo mamahimong i-report gilayon sa otoridad gani gidiskurahe nila ang pagpakalat og mga mali nga impormasyon aron dili mag-panic ang katawhan.
RadyoMaN Renz Barbarona
