Patay na nahidangat sa Southern Philippines Medical Center ang lalaking kawatan human nga misukol sa kapulisan nga sakop sa Ecoland PNP ubos sa mando ni Police Major Rose Aguilar.
Usa ka Rey Gulane ang nanawag ug nagpahibawo sa Ecoland PNP mahitungod sa wala mailhing lalake nga nakasando ug nagsuot og short ang misulod ug migawas sa compound apan may bitbit nang mountain bike nga mukantidad og 20mil ka pesos, vivo, keypad, ug uban pa.
Gumikan sa maong inpormasyon, wala maglangan ang grupo ni Police Lieutenant Alfred Caminade, Deputy Commander sa Ecoland PNP sa pagresponde ug naabtan pa ang suspek sa dapit.
Imbis nga mutahan ang suspek giingong mibunlot og pistola ug dayon nakigpinusilay ang suspek sa mga otoridad maong napugos og balos ang kapulisan.
Naigo sa nagkadaiyang parte sa lawas ang suspek ug nahapla sa dalan ug daling gidala sa SPMC sa pamasin nga mabuhi pa apan maantimano og pagka-igo ang suspek resulta sa iyang hinanaling kamatayon.
Ang Scene of the Crime Operatives kon SOCO XI nakarekober og punto 38 nga revolver, mga basyo sa mga bala nga iya sa maong armas ug sa 9mm pistol.
Nakuha pa gikan sa suspek ang pinaugang marijuana nga mukantidad og kapin usa ka libo ka pesos.
Ang suspek nagpabilin pang Mr.X nga naa karon sa morgue sa SPMC.
RadyoMaN Joel Viray
