Davao City – Dagsang na ang mga pasahero sa Davao City Overland Transport Terminal (DCOTT) ingon man uban pang mga terminals sa syudad aron muuli karong Noche Buena.
Sumala ni DCOTT manager Aisa Usop nga gi-expectar na nila daan ang kadaghanon sa pasahero sugod niadtong miaging semana hangtod karon diin kahinumduman iyang gibutyag nga gipaniguro sa Southern Mindanao Bus Operators Association (SYMBOA) nga dunay igong mga bus sa DCOTT alang sa mga pasaherong muuli sa ilang tagsa-tagsa ka mga probinsya.
Kagahapon, makita sa gipost nga litrato sa DXDC digital sa social media ang linya sa mga tao sulod sa terminal gani naguol ang ubang mga netizens pagkakita niini diin usab sila muuliay pa karong adlawa.
Nanghinaut karon ang mga pasahero nga makasakay nga dili pa alanganin sa ilang pag-andam sa Noche Buena.
Subay niini, gipaniguro usab sa dcott ang seguridad sa mga pasahero diin gibutyag ni Usop nga iyaha nang gipulong ang iyahang mga security personnel kauban ang team leader sa Task Force Davao.
RadyoMaN Renz Barbarona
