Sarangani Province–Sa nahitabo bag-uhay lang nga unang regular sesyon sa Sangguniang Panlalawigan sa Sarangani Province pagsugod karong tuiga 2019, duha ka resolusyon ang giduso ni Board Member Hermie Galzote, chairman sa Komitiba sa Legal Matters, og suportado sa tanang kaubanan, naghatag og pagtugot ngadto kang Governor Steve Chiongbian Solon nga pirmahan ang Financing Agreement tali kang Department of Finance Secretary Carlos Dominguez isip sya ang chairman sa People’s Survival Fund Board aron masugdan na pag-implementa ang proyekto sa Maitum, Sarangani Province gitawag nga “Saub Watershed Ecosystem Rehabilitation and Flood Risk Reduction for Increased Resilience.”
Sa maong Financing Agreement, muhatag og P93.5 Milyones ka pesos ang pamunuan ni Pangulong Rodrigo Duterte pinaagi sa People’s Survival Fund alang sa maong proyekto para sa usa sa pinakadakong sapa nga direktang maka-benipisyo ang siyam (9) ka barangay sa Maitum, lakip na ang mga boundary sa lungsod sa Kiamba.
Samtang ang Provincial Government sa Sarangani ang may counterpart nga P9.3 Milyones ka pesos. Dakong si-ak sa pondo ang gigahin para maka-konstrak og lig-on nga Spillway malikayan na ang pag-awas sa tubig-baha og mapalambo pa ang irigasyon.
Apan dili ra imprastraktura ang unod sa proyekto kundili apil pa ang panginabuhian pinaagi sa Agro-Forestry. Mananum ang mga residente sa mga ginatawag nga deep-rooted fruit trees pangpugong sa mga landslide, may pagamugnaon pud nga mga nursery og demo farm. Ang bunga sa mga fruit trees ang maoy panginabuhian sa mga lumulupyo pinaagi sa pagbaligya.
