Preparado na ang ECPC kon Environmental Conservation and Protection Center sa probinsya sa Sarangani isip organizer alang sa umaabot nga ikaduha nga Raptor Watch Festival matigayon karon ng semanaha, ugma na gyung adlawa, Miyerkules, Oktubre 2.
Segun ni Kido Ramirez, ang executive director sa ECPC ilalum sa opisina ni Governor Steve Chiongbian Solon, “all set” na ang ilang pagpangandam kauban ang ilang mga partner, sama sa Raptorwatch Network Philippines, Philippine Eagle Foundation, Protect Wildlife-USAID nga gipondohan sa nasud Amerika, DepEd Sarangani, LGU Glan sa pagpanguna ni Mayor Vivien Yap, ug ang mga barangay official ug tribal leaders sa upat (4) ka barangay gilangkuban sa Rio del Pilar, Cross, Laguimit ug Batulaki, sa pagsuporta usab nila Senador Manny ug Congressman Ruel Pacquiao, Vice Governor Elmer De Peralta ug mga board member.
Gipaniguro ni Ramirez nga sayon tultulon ug dili malisdan sa dalan padulong sa venue sa Raptor Hill sa Rio del Pilar, Glan tungod kay sementado ang dalan, mao kini ang national highway padulong sa pikas probinsya nga Davao Occidental. Ang lokasyon sa Raptor Hill ang kilid lang sa national highway sa Barangay Rio del Pilar.
Libre kini walay bayad maong higayunan matud pa sa mga mahiligon nga musud-ong sa mga langgam ug sa mga turista apil na ang mga estudyante nga buot mulantaw isip kabahin sa ilang pagtuon, nga adtuan ugma ang usa (1) ka adlaw nga Raptor Watch Festival. Dili magmahay sa panahon ang mga turista tungod kay pagkasunod adlaw, adlaw nga Hwebes, mao na pud ang pagsugod sa usa ka semana nga selebrasyon sa Lubi-Lubi Festival ug ang foundation anniversary sa Glan.
Dili kini mga ordinaryong langgam kundili mga migratory raptors nga ang gidak-on ang susamag manok nga broiler, may timbang nga sobra usa (1+) ka kilo. Gitawag silag raptor tungod sa ilang hait nga sungo ug kuko nga kayang makatukob og mga peste sa agrikultura sama sa ilaga, bakukang apil na bitin, rason nga gitawag silag mga natural pest control nakatabang sa pagbalanse sa kinaiyahan.
Migratory raptors sila nga gikan pa sa Japan, Taiwan ug pipila ka parte sa China nga ga-byahe matag tuig padulong sa Indonesia panahon sa ting-tugnaw sa ilang lugar, ug apil sa ilang ruta ilang ginatultol ang agianan sa Glan. Ginahimo nilang stopover ang kalasangan sa Mount Gulo ug Mount Taltak sa Glan una mupadulong sa nasud Indonesia.
Hinungdan pud nga magpadayon karon nga 2nd Raptor Watch Festival ang pagpananum og mga kahoy sa maong mga kabukiran. Niaging tuig 2018, adunay 2,500 kabuok semilya sa mga fruit trees ug endemic trees ang natanum. Ang naghatag sa libuan ka mga seedlings hangtud ning panahuna mao mismo ang mga Hapon nga bird watcher ug researcher ilalum sa Japanese Society for the Preservation of Birds.
Una ng gihangyo sa barangay council sa Rio del Pilar pinaagi ni Barangay Kapitan Boy De Gracia nga tabangan sila sa Japanese Society for the Preservation of Birds sa ilang reforestation project tungod nagtuo sila nga mawala og dili na muagi sa ilang lugar ang maong mga migratory raptor kung madaot ang ilang kalasangan. Og tuod man, ni-sponsor sa libuan ka mga semilya sa kahoy ang Japanese Society for the Preservation of Birds gikan pa niaging tuig.
