Ecstasy subling mibalik sa Davao human sa kapin dekada

48

Davao City – Gikumpirma sa Philippine Drug Enforcement Agency (PDEA)-XI nga ikaduha pa nga kaso ang ecstasy nga droga nga nasakmit dinhi sa syudad sa Davao pinaagi sa mag ig-agaw nga na-aresto niadtong Huwebes (Pebrero 4, 2021) diin gibana-binaang anaa sa kapin kun kulang 1 million pesos ang kantidad sa iligal nga droga nga narekober.

Sa interbyu sa DXDC RMN Davao kang Noli Dimaandal, Spokesperson sa PDEA-XI, gibutyag niini nga niadto pang tuig 2009 natala ang unang kaso sa ecstasy sa dakbayan.


Matud ni Dimaandal, mahal nga klase sa party drugs ang ecstasy diin sa pagkakaron mubalor na kini og P1,700 matag tablet, rason nga mga kwartahan ang sagad maka-afford niini, kung itandi sa shabu nga mas barato kaysa sa maong iligal nga droga.

“Actually, pang duha pa ‘ni. 2009 pa ‘tong first, then kini second ‘ni. Pero medyo daghan-daghan gyud ‘ning MDMA (methylenedioxy-methamphetamine) or ecstasy ang na-confiscate sa ilaha (500 pieces) ug naa pa gyoy mga nagkadaiyang klaseng iligal nga droga,” tataw ni Dimaandal.

Luyo sa nasitiang pandemya, matud sa tigpamaba sa PDEA-XI, padayon ang ilang hugot nga kampanya batok sa iligal nga droga kaabag ang uban pang law enforcement agencies.

RadyoMaN Kirby Manzon




Facebook Comments