Adunay mga maayong nagpaabot sa unahan ang kahibalo muantos ug musakripisyo.
Ug ingon man bulahan ang mga nilahutay ug gilantaw nga para sa kaayuhan ang matag pagsulay.
Grade 5 pa lang si Jacky nga nagkabulag ang iyang mga ginikanan.
Nagdako man nga wala ang iyang mga biological parents wala kini nahimong babag aron dili siya magpursiger sa iyang kinabuhi.
Tungod sa maong sitwasyon sa iyang pamilya, iyang mga iyaan ang nagsilbi niining mga ginikanan kinsa maoy iyang gidak-an ug nitabang kaniya aron makapadayon siya sa iyang pag-eskwela.
Blessing in disguise kini ingon man sa kinabuhi ni Jacky, gikan Tupi South Cotabato nagpadayon ang iyang istorya dinhi sa dakbayan sa Davao.
Puno siya sa pagpangga ug pagmahal diha sa poder sa mga nagpadako kaniya.
Nahimo kining inspirasyon alang kaniya nga maningkamot nga mulampos.
Susama sa ubang mga estudyante wala nahimong sayon alang kaniya ang iyang gipang-agian sa kolehiyo sulod sa upat ka tuig isip estudyante sa kursong Communication Arts sa University of Immaculate Conception.
Daghang pagsulay, pulaway ang iyang gisugakod diha sa iyang pag tuon.
Taliwala sa kalisod iyang gipaningkamutan nga dili siya mabagsak sa iyang mga subjects ug aduna siyay mapakitang maayong mga grado nga siguradong ika-proud sa iyang mga ikaduhang parents nga naghatag og higayon sa iyaha nga makaeskwela sa pribadong tunghaan.
Aduna may panahon nga lisod na gyod para kaniya pero padayon lamang siya diha sa pagsangpit sa Ginoo nga tabangan siya ug lig-onon pa siya diha sa kahuyangon.
Wala gayud nagmahay ug wa kapugngi ang mga luha sa iyang iyaan human nga nisaka kini sa entablado aron itaod ang medalya ni Jacky nga maoy bunga sa ilang mga pagpaningkamot.
Niadtong Marso 17, kami usab mismo sa DXDC nitunol ngadto kang Jacky sa among pasidungog ug rekognasyon ngadto kaniya isip usa ka maayong ehemplo sa mga kabataan sa natad sa edukasyon.
Ang atong usa sa mga DXDC Excellence awardee nga si Jacky usa ka inspirasyon ngadto sa tanan.
Daghan na ang midaog tungod kay wala sila muondang. Kon maningkamot kita ug molahotay gantihan kita sa Diyos ug muresulta kini sa kalamposan.
RadyoMaN Aimee Guinita
