Davao City – Tantsahon usa karon sa mga progresibong grupo kung igo lang nilang gubaon o sunugon ba ang mga effigy ni Presidente Rodrigo Duterte, US President Donald Trump ug Chinese Xi Jin Ping.
Gibutyag ni Kilusang Mayo Uno (KMU) XI Southern Mindanao Sec. General Carlo Orlalo nga ang pagguba o pagsunog sa effigy usa ka pamaagi aron mapadayag nila ang ilang kasuko ngadto sa pangulo sulod sa duha ka tuig niini sa pwesto.
“Kung mudesisyon ang katawhan dinhi kung madunggan nato ang bag-ong statement ni Presidente Rodrigo Duterte sa saad niya pwedi gihapon nga among sunugon para pag-address diha sa bag-ong statement niya,” sumala ni Orlalo.
Sa pikas bahin mamahimong kasuhan ang mga lider sa mga raliyista kung dabdaban nila ang mga effigy atol sa ilang lihok protesta.
Segun ni Sta Ana Police station Commander PCI Michael Uyanguren nga usa kini ka bayolasyon.
“Kung magsunog sila og effigy amoa kanang patyon ang kalayo. Violation man gyod ang pagsunog diha sa lighting demonstration usa na siya sa ground nga pweding arestuhon ang kining demonstrator nga nagsunog pinaagi sa ilang lider,” matud ni Uyanguren.
Matud ni Uyanguren subay sa mando ni Davao City Police Office Director PSSUPT Alexander Tagum iobserba gayod nila ang maximum tolerance ngadto sa mga raliyista.
“Testingan lang nato sila’g hangyo pero aron dili lang masamok naa man tay taga-fire department diha nga mupalong sa siga,” segun ni Uyanguren.
RadyoMaN Aimee Guinita
