EKSKLUSIBO | Isa ka preso sang Roxas City Jail, nakapalagyo matapos nahibaloan nga may bag-o nga karelasyon ang live-in partner sini!

Roxas City, Capiz- Nakapalagyo ang isa sa mga preso sang BJMP Roxas City Jail nga nahamtang sa Barangay San Jose sining siyudad.
Ini ang ginkumpirmar sang warden sang BJMP-Roxas nga si Atty. Jairus Anthony Dogelio.
Ginkilala ang nakapalagyo nga inmate nga amo si Jayson Santa Maria y Borlado nga may yara sang kaso nga robbery kun sa diin padayon pa nga gina-hearing sa RTC Branch 18 sa Roxas City Hall of Justice.
Suno kay Dogelio, nagbaga ang tiil sang isa ka preso nga nagabulig sa pagluto gani nga nagpresentar si Borlado nga magabulig. Diri siya nakakuha sang tsansa nga makapalagyo pinaage sa pagtaklas sa pader sa kitchen area.
Ginapatihan nga nagpalagyo ang amo nga preso matapos nahibaloan sini nga may yara na sang bag-o nga karelasyon ang live-in partner sini.
Sa subong padayon ang manhunt operation sang mga katapo sang BJMP-Roxas. Nakig-angot naman ang mga ini sa mga kapulisan sa Roxas City PNP agod nga madakpan ang amo nga inmate.