El Niño hugot gipangandaman

22

Davao City – Opisyal nang gideklara sa Philippine Atmospheric, Geophysical and Astronomical Services Administration (PAGASA) ang hingpit na nga pagsugod sa dry season sa tibuok Pilipinas.

Gani ang Department of Agriculture (DA-XI) nangandam na daan sa pag-abot sa huwaw nga siguradong maoy mohubas sa mga kasapaan ug mupatay sa daghang mga pananum sa rehiyon.

Matud ni Roy Joseph Pascual, DA-XI Disaster Management Focal Person nga nabati na karon sa mga mag-uuma ang epekto sa grabe kainit sa panahon karon.

Lauman ang mas grabe pang pagtaas sa temperatura sa kainiton nga magpasamot sa huwaw nga molatas sa 16 ka probinsiya sa nasud sugod karong adlawa.

Nasayrang moabot hangtud sa bulan sa Agosto ang huwaw diin ang Mindanao usa sa maigo sama sa Davao region ihimplo na ang Davao Oriental kinsa nga nagdeklara og state of calamity di pugay.

Apan gipasalig ni Pascual nga aduna na’y hinanali nga programa ang ilang buhatan aron tabangan ang mga mag-uuma nga makulban og panginabuhian sa uma sulod sa pila ka bulan gumikan sa El Nino.

Gani kabahin sa lakang sa DA-XI mao ang pagpakigduyog sa Philippine Air Force aron pangayoon ang ilang ayuda sa pagpahigayon og ‘cloud seeding operations’ aron makamugna og ‘artificial rain’ palibot sa rehiyon.

Hinoon, wala pa’y ensaktong petsa sa pagpahigayon og ‘cloud seeding’ nga dakung tabang unya sa pag-ugmad sa mga kaumahan.

Gidugang ni Pascual nga ang ilang buhatan nag-andam na usab og mga binhi kun seedlings alang sa mga mag-uuma sa mga lungsod sa Matan-ao,Kiblawan,Magsaysay, Hagonoy ug Bansalan nga pulos sakop sa lalawigan sa Davao Del Sur nga gikatahong gibigwasan og maayo sa dry spell.

RadyoMan Joel Viray

Facebook Comments