Davao City – Subay sa pag-abli sa Barangay ug Sangguniang Kabataan (SK) Election, giatangan usab sa pag-abli ang buhatan sa Commission on Elections (COMELEC) sugod alas 5:30 sa kadlawon karong adlawa, Abril 14, sa mga mukandidato sa May 14 synchronized election.
Naabtan sa DXDC News Team sila si Kapitan Allan Simoag sa Brgy. Lasang uban iyang mga kagawad ug si Kapitan Rene Gatchalian sa Brgy. 8-A Father Selga, kinsa mga nag-una sa linya alang sa pag-file sa ilang Certificate of Candidacy (COC).
Gani, sa umaabot nga May 14 election period naglaum si Ateneo de Davao Political Science Professor Ramon Beleno III nga mamahimong ‘matured’ ang mga lokal nga botante.
Gibutyag niini nga subli nilang ilusad ang ‘Blue Vote’, usa ka electoral engagement nga organisasyon kinsa tumong mao ang pag-edukar sa kabarangayan nga dili angay pulitika ang motibo sa umaabot nga pagbotar.
“Nakikita namin na ang barangay nagiging political na siya kasi barangays ang front line ng mga gustong tumakbo sa 2019 election,” matud niini.
Sa pikas bahin, walay nakumpiska nga armas gikan sa mga byahedor sa habagatang bahin sa Davao Region sugod sa pag-implementar sa ‘election gun ban’ kaganihang alas 12:00 sa tungang kagabhi-on sumala sa kasundaluhan nga nagmontar ug COMELEC checkpoint uban sa Task Force Davao (TF Davao).
RadyoMaN Jason Amisola
