Davao City – Sa pagkakaron, dili pa makasulti ang Parish Pastoral Council for Responsible Voting kun PPCRV nga katuhoan gayud ang alegasyon sa Otso Diretso, mga militante ug sa Catholic Bishops Conference of the Philippines nga may natigayon nga tikas kun trampas sa bag-ohay nahuman nga midterm election.
Segun ni PPCRV Chairperson Henrietta De Villa, hangtud dili makapresenta og mga ebidinsiya ang mga nag-akusa aron suportahan ang ilang pasangil nga nanikas ang gobyerno karon sa midterm election 2019, dili motoo ang ilang organisasyon sa giingong tikas sa piniliay.
Matud ni De Villa nga dapat maglatag og mga ebidinsiya ang mga nagduda nga mihimo og binuang ang gobyerno sa piniliay aron masiguro ang kadaugan sa mga kandidato nga gi-endosar ni Pres. Rodrigo Duterte ug mapildi ang mga kandidato sa Otso Diretso nga gipaluyohan sa Liberal Party.
Sa PPCRV Command Center, gihimo ang unofficial parallel count diin ang resulta sa election returns ginatandi kini kun pareho ba o dili ang figures sa ihap sa boto apan walay makita nga timailhan ang maong organisasyon nga may limbong nahitabo niadtong Lunes.
Kuti ang gi-agian nga proseso sa election returns kay katulo kini susihon dayon balidasyon pinaagi sa electronic results gikan sa transparency servers aron masuta kun may diperensiya ba o wala ang datos apan kun anaa man, pangitaon ang rason ug ang tubag diin ang COMELEC maoy katapusan nga venue alang sa pagsusi.
Ang pagkalangay sa iniphanay sa boto sulod sa pito ka oras tungod kadto sa pag-overload sa system nunot sa kabug-at sa transmissions sa transparency servers ug dili tungod kay gi-sabotahe sa kagamhanan ang resulta sa eleksyon alang sa kadaugan sa mga kandidato nga gi-endosar.
Sumala ni De Villa nga sayon ra kaayo ang pag-akusa nga nagbuhat og tikas ang kagamhanan apan lisod pamatud-an hilabi na nga ang walo ka kandidato sa pagka-senador sa Otso Diretso sa Liberal Party pulos nangapildi sa piniliay.
Wala pa’y nakita nga bug-at nga rason ang PPCRV chairperson aron ibalik sa manual kun ‘mano-mano’ ang eleksyon sa Pilipinas sa sunod pa nga mga katuigan sanglit ma-manual man o automated ang tikas ang piniliay dili gayod mahunong ug ma-undang sama sa pasangil sa Catholic Bishops Conference of the Philippines kun CBCP.
RadyoMaN Joel Viray
