Davao City – Isip preparasyon sa taliabot nga 2019 Midterm Election, nagpahigayon og reshuffling ang Commission on Election (COMELEC) sa mga election officers sa nagkalain-laing lugar.
Sa pakighinabi sa DXDC RMN Davao kang Atty. Krisna Samantha Caballero, spokesperson sa COMELEC-XI, gikumpirma niini nga si Atty Michael C. Abas ang magsilbing COMELEC Regional Director sa Davao region sa taliabot nga eleksyon samtang gi-assign usab sa Region IX o sa Zamboanga si Atty. Remlane Tambuang.
Nasayran nga tumong sa maong reshuffling sa mga ‘key election officers’ mao ang paglikay sa posibleng partiality sa bahin sa COMELEC officials atol pinili-ay.
Dugang pa ni Caballero nga sa pagkakaron, nagapadayon ang ilang mga trainings alang sa mga electoral board ingon man pagpahigayon og candidates forum labi na sa pagsugod sa campaign period sa mga lokal nga kandidato.
“On going gihapon ang atong mga trainings with regards para sa atong mga electoral board. Naa na poy nag start og conduct og mga candidate forum labi na nga hapit na pud mag start ang campaign period para sa atong lokal.”
RadyoMaN Kirby Manzon
