General Santos City—nagtingkagol karon sa Police Station 2 ang usa ka electrical lineman nga nailang si Carlito Fuentes Oliver, 25, nga taga Agusan Del Sur human nga gidungab niini ang iyahang kauban sa trabaho sa Carmel Light Manpower And Allied Services Inc. nga si Karlon Saplot Kant, 43, lumad nga taga Iligan City.
Sumala pa sa imbistigasyon sa kapulisan nga nag-inom ang suspect ug biktima uban ang lain pang kaubanan sa trabaho alas 7.00 ang takna sa gabie sa ilahang bunkhouse sa Roca Subd., Barangay Apopong, apan sa nag kadugay ang tagay alas 9:45 ang takna sa gabie nagkalalis na matud pa ang mga nasangpit tungod sa ilahang trabaho hinungdan nga nag bikil ug didto nahitabo ang kagubot.
Gi-dungab sa suspect ang biktima ug buak nga botekya sa ilimnong makahubog igo sa tiyan niini kansa daling gidala sa balay tambalanan samtang naka-angkon usab ang suspect ug samad sa iyahang liog.
daling gidakup sa mga kakaubanan sa biktima ang suspect ug gi turn-over sa police station 2.
Sa karon gihuwat nalang sa kapulisan ang desisyon sa pamilya sa biktima kung ila bang pasakaan ug kaso ang suspek. (Dave Silagan)
(Photo From Web)
