General Santos City–Electrical overloading ang usa sa mga ginatutukan karon sa Bureau Of Fire Protection-Gensan nga posibleng sinugdan sa kalayo nga mi-abu sa ubay-ubay nga mga balay sa Prk. Islam Barangay Dadiangas South ning syudad.
Sumala pa ni SFO1 Nelson Bato ang Arson Investigator sa BFP-Gensan nga namatikdan matud pa nila sa maong lugar nga dikit-dikit ang mga balay ug gigama sa light materials hinungdan nga daling gilamoy sa kalayo.
Dugang pa niini nga pulos usab series ang mga linya sa kuryente sa maong lugar tungod sa kadaghan ug boarding house hinungdan nga posibleng nahitabo ang overloading sa mga gipangsaksak nga miresulta sa sunog.
Samtang sa maong panghitabo nakabsan sa iyahang kinabuhi ang usa ka 6 anyos nga bata nga gi-ilang si Bainor Putian nga nabilin matud pa sa maong lugar sa dihang nagsugod ang kalayo tungod kay ang amahan niini ang anaa sa palengle nanginabuhi.
Gibutyag usab ni SFO1 Bato nga nagsugod matud pa ang kalayo sa kilid sa boarding house nga ginapuy-an sa pamilyang Putian hinungdan nga wala na nakahawa ang biktima.
Mukabat usab sa 600 mil ka pesos ang gibana-banaang damyus sa maong panghitabo, kung kahinumduman nga niadtong bulan sa Desyembre milabay nga tuig nasunog man usab ang Prk. Islam kung asa gatusan usab ka pamilya ang apektado.(Dave Silagan)
