Davao City – Gipasidan-an sa Davao Light and Power Company kun DLPC ang publiko nga regular sutaon ang mga wirings sa balay.
Sa pakighinabi sa DXDC RMN Davao kang Corporate Communications Officer Ross Luga sa DLPC atol sa programang Serbisyong Straight to the Point, gibutyag niini nga sagad hinungdan sa sunog mao ang faulty wirings ug overloaded circuit.
Kahinumduman nga gibutyag sa Bureau of Fire Protection kun BFP-XI nga base sa datos sa Hulyo 2018, adunay 44 fire cases sa rehiyon ang natala diin sagad hinungdan mao ang bahin sa electrical.
Sumala ni Luga nga dili balewalaon ang mga karaan nga wires sa balay ug sa mga gambalay ug ipa-review usab kini sa electrician aron masuta og safe pa ba ang mga wires o dili na.
Dugang niya nga importante usab nga masayod sa power load sa tanang appliances nga gamiton aron dili musobra sa kapasidad sa kuryente nga gisaksakan sa mga gamit diin matud pa nga delikado usab ang paggamit og extension wires og daghan nakasaksak niini ilabi nga ibutang sa agianan kun walkway nga posibleng masagiran.
Subay niini, pahinumdom sa DLPC ngadto sa mga konsumante nga importante nga masayod tanan ang miyembro sa pamilya bahin sa pagpangandam ugaling adunay short circuit o mga problema sa electrical sa balay aron dili mataranta ug aron usab mapugngan o malikay sa sunog.
RadyoMaN Renz Barbarona
