CAPIZ – Naglab-ot sa 37 ka mga barangay sa probinsya sang Capiz ang nalakip sa election watchlist areas (EWAs) sang PNP kag COMELEC. Ini ang ginkumpirmar ni Police Senior Superintendent Samuel Nacion, Provincial Director sang Capiz Police Provincial Office.
Suno diri nga ang amo nga numero ang natunga sa tatlo ka mga kategorya base sa parameter nga ginpaguwa sang Police Regional office 6. Ang category 1 amo ang mga barangay nga may ara sang intense political rivalry ukon may election related incident sang nagligad nga eleksyon. Yara sa category 2 ang mga barangay nga may presensiya sang mga rebelde. Samtang category 3 naman ang mga lugar nga may intense political rivalry kag presensiya sang mga rebelde.
Kalakip sa category 1 ang walo ka mga barangay kun sa diin duha diri nagikan sa banwa sang Pontevedra kag Cuartero; tig isa naman sa banwa sang President Roxas, Dumarao, Sapian kag Roxas City. Sa category 2, nalakip diri ang ang 16 ka barangay sa banwa sang Tapaz, anum sa Maayon, tatlo sa Cuartero kag tig isa sa Pontevedra kag Dumarao. Samtang isa gid lamang ka barangay nagikan sa banwa sang Cuartero ang nalakip sa category 3.
Nahibaluan nga naglab-ot sa 473 ka mga barangay ang nasakupan sang probinsya sang Capiz. Ginpahayag ni Nacion nga ginatutukan na sang PNP kag Philippine Army nila ang nasambit nga mga lugar agud mapabilin nga malinong kag matawhay ang nagahilapit nga Barangay kag SK election sa maabot nga Mayo 14.
