Davao del Norte – Bisan pa man sa sagunson nga kasamok nga nahitabo sa Barangay Tanglaw, Braulio E. Dujali, Davao del Norte sa adlaw sa piniliay, Mayo 14, gikonsidera gihapon nga “peaceful” ang assessment sa COMELEC sa maong dapit.
Gisulti sa Election Officer nga si Girlie Iluisa atol sa interview sa DXDC nga bisan pa man og dunay nahitabong kagubot, malampuson man nga nakabotar ang mga narehistrong botante sa maong lugar nga giharangan sa ubang residente.
Reklamo sa mga residente sa Barangay Tanglaw nga dunay daghang gipanghakot nga mga botante kinsa ilang gitawag nga mga ‘flying voters’ gumikan kay dili man nila kini mga silingan ug wala matud pa kini nagpuyo sa ilang lugar. Dugang sa ilang mga mulo nga kadto hinuong mga dugay nang nagpuyo didto, wala na hinuon sa listahan.
Gipaklaro ni Iluisa nga mamahimong moreklamo ang mga residente may kalabutan sa gitawag nga mga ‘flying voters’ apan dili sa adlaw mismo sa piniliay. Panawagan niya sa katawhan nga aron maaksyonan ang ilang reklamo, ipaagi kini sa saktong proseso.
Tungod sa nahitabong kasamok, gidala sa Dujali PNP ang usaka William Gonzales Alijado, 53 anyos, minyo ug residente sa Prk. Pomelo, Brgy. Caganguhan, Panabo City. Gisulti ni Police Senior Inspector Lurobe Rojo Jr., ang Chief of Police sa Dujali PNP, gidakop si Alijado gumikan usa kini sa mga nagpasiugda sa kasamok. Butang nga gihimakak sa dinakpan ug gipanawagan niini ang hustisya. Matud pa, milantaw lamang si Alijado sa kasamok apan siya na man hinuon ang gidakop. Posibleng pasakahan ang dinakpan og kasong Obstruction of Election Proceedings tungod sa maong panghitabo.
RadyoMaN Misel Miral
