Davao City – Gikinahanglan pang ipailawom sa daghang mga trainings ang mga estudyante ug katawhan kabahin sa mga pagpangandam kung unsay hustong himoon sa higayong adunay katalagman nga moabot sama sa linog, bagyo, baha ug uban pa.
Sumala ni Barangay Crossing Bayabas Toril Barangay Captain Tirso Abrante, sa nahitabo kagahapon sa mga tinun-an sa Crossing Bayabas National High School, gikinahanglan pa gayud og daghang mga earthquake drills tungod kay wala pa nila ma-adaptar ang mga pagahimoon sa higayon nga dunay linog kay nag-panic gihapon sila ug wala magamit ang mga gihimong pagpanudlo ngadto kanila.
Nunot niining mga sunod-sunod nga linog nga nagapanghitabo, nagpasabot lamang kini nga gikinahanglang andam gayud kanunay ang mga tawo sa pag-responde sa higayong mahitabo kini tungod kay dili na matagna ang panahon karon.
Gi-rekomendar usab ang dugang pang mga action nga himoon sama sa pag-training pa ug daghang mga tawo aron daghan ang makahibalo sa ilang himoon kung adunay mga kalamidad nga mokunsad.
RadyoMaN Bernard Pantallon
