General Santos City—samdan ang usa ka empleyado sa gobyerno human kining gitigbas sa usa ka lalaki atubangan sa usa ka gasolinahan nga nahimutang sa J. Catolico Avenue, Barangay Lagao Gensan.
Giila ang biktima nga si Zar Jorden Emodo, 23, government employee residenti sa Purok 3, Baluntay, Alabel, Sarangani Province . Samtang ang suspek giilang si Kenny Roger Toledo Vasquez, 28, residenti sa Purok 2, Barangay Katangawan Gensan.
Sa inisyal nga imbistigasyon sa Police Station 3 nasayran nga alas 12:00 pasado sa kaadlawon kagahapong adlawa samtang anaa sa usa ka convenience store ang mga nasangpit, nagkalalis ang mga nahisgutan.
Milakaw ang duruha hangtod nga makaabot atubangan sa usa ka gasolinahan sa barangay Lagao, didto na nahitabo ang pagpanigbas sa suspek ngadto sa biktika diin nakaangkon kini ug samad sa iyang likod nga bahin.
Paspas nga misibat gikan sa lugar ang suspek samtang ang biktima daling gidala sa ospital human sa insidenti. Nakarespondi gilayon sa lugar ang kapulisan human nga duna dayoy nireport sa ilang buhatan nga miresulta sa pagkasikop sa suspek.
Sa karon ginaandam na sa Police Station 3 ang pagpasang-at ug kaso batok sa suspetsado.
