Patay ang empleyado sa kagamhanang lokal ning dakbayan, lakip na iyang bana ug usa ka igsoon niini, human mabangga ang ilang gisakyan, alas 7:00 sa gabii niadtong Sabado, sa Barangay Tubigan, Initao, Misamis Oriental.
Naila ang mga biktima nga sila si Rosa Apag, 55 anyos; iyang bana nga si Gilberto ug igsoon nga si Maria Teresa Zaragoza, 46 anyos, pulos mga taga-Iligan City.
Samaran sa aksidente ang anak ni Maria Teresa nga si Edgardale, 17 anyos, kinsa maoy nagmaneho sa ilang gisakyan, ug ang usa pa ka igsoon ni Apag ug ni Zaragoza nga si Hermelinda Vente, 56 anyos.
Matud pa ni PO3 Francis Dadole sa Initao Municipal Police Station, nga pauli na paingo’g Iligan ang mga biktima dihang gisulayan sa driver nga mo-overtake apan dunay matagbo nga laing sakyanan, hinungdan nga mobalik unta kini sa iyang lane.
Apan tungod kay aduna usay laing sakyanan, mideretso na kini sa kilid ug mibangga sa usa ka punoan sa kahoy.
Nadala pa sa tambalanan sa Initao ang mga biktima apan gideklara kining dead-on-arrival.
Si Apag na-assign sa City Veterinarian’s Office isip Administrative Officer Designate.
Panahon sa giyera sa Marawi, aktibo kining misalmot sa pagpahatud og mga pagkaon sa mga K9 nga iro nga gigamit sa operasyon sa Armed Forces of the Philippines lakip na ang pagpakaon sa mga iro nga naglatagaw sa kanhi main battle area human nabiyaan sa ilang mga tag-iya nga namakwit tungod sa giyera. (Divina M Suson)
