Tambulig, Zamboanga del Sur – Gipasalamatan sa usa ka negosyante ang empleyado sa LGU ug tropa sa PNP nga nagbantay sa Quarantine Control Point (QCP) nga maoy naka-uli ug nakakaplag sa pitaka nga nawala dihang dapita sa Brgy. Balucot, Tambulig, Zamboanga Del Sur.
Daw naibtan og tunok si Jovelyn Jala Reroma, nga taga- Purok Manggahan, Tinago, Ozamiz City, Misamis Occidental dihang nauli sa iyang posisyon ang pitaka nga gisudlan sa daghanang dokumento, ATM Cards ug 20,000 pesos.
Nasayran ang unang nakakaplag sa maong pitaka si Jephy Tagdulang Monares, casual nga empleyado sa Local Government Unit (LGU) sa Quarantine Control Point (QCP) sa Tambulig ug iya dayon kining giturn-over ngadto kang Patrolman Bryan Ponce Banate, ug largo usab dayon nilang giturn-over kang PCMS Ponciano Dugenia Edaño Jr, ang Team Leader sa team nga nagbantay sa border.
Wala ablihi sa PNP ang pitaka hangtod nga miabot ang nangita ug nagpa-ila nga tag-iya nga si Reroma ug giusisa namatud-an ang siya mao ang tag-iya sa pitaka nga rason nga gitunol kini pagablik kaniya.
Sadya ang negosyante kay anaa ra sa maayong kamot ang pitaka nga dunay ATM nga dunay sulod nga kwartang 140,000.
Nakalihak sa kalipay si Reroma ug nagpasalamat sa grupo sa mga Frontliners nga nadestino sa maong Quarantine Control Point.
