Muerto el un empleyao del Zamboanga City Water District despues tiene con este quien ya sopla de tiro mientras ta camina le na camino del San Roque enantes aga.
El jefe del Sta. Maria Police Station si Chief Insp. Rolly Joaquino ya nombra con el victima como si Erwin Delos Santos Agustin, 44, y ta queda na San Roque.
El victima ya sostene tupada del bala na canesa. Ya lleva conele corre na hospital pero ya despidi siempre este.
Na cubrida del DXRZ-RMN Zamboanga na lugar del incidente ya puede sabe que si Agustin caminando na calsada serca man alas 7 del aga cuando tiene ya dos persona muntao na un motorsiclo ya aparese y el ancas ya sopla de tiro conele.
El maga suspechao ya entabla despues del incidente.
Asegun con Joaquino si Agustin embuelto na vendida de shabu na lugar del San Roque.
Del Domingo ya precura el maga pulis cuji con Agustin pero bien mailap este y ya puede escapa.
Ta cre el pulis drog el motibo del matansa con Agustin.
