Davao City – Nagpahimangno ang Department of Interior and Local Government (DILG) nga hugot nga gidili ang pagpatuman sa “no vaccine, no work” policy.
Sa interbyu sa DXDC RMN Davao kang Alex Roldan, DILG-XI Regional Director, gibutyag niini nga mag atubang og criminal offense ang mga employer kung ilaha kining ipatuman.
Gipasabot ni Roldan nga dili tambal ang bakuna kundili usa lamang kini ka pamaagi nga maproteksyonan ang usa ka indibidwal batok sa Coronavirus Disease 2019 (COVID-19).
“Bawal gyud na. Mag atubang og criminal offense ang mga employer kung ilang himuon ni nga kung dili magpabakuna, dili nila patrabahoon. Dili gyud na siya pwede. We have to remember nga ang bakuna is not the cure. Ang bakuna is just there to let us develop og antibodies kontra niining sakita,” tataw ni Roldan.
Dugang ni Roldan nga dili garantiya nga kumpleto na ang imong proteksyon kung ikaw mabakunahan na. Gawas niana, subling gipasabot sa DILG official nga boluntaryo ug dili mandatory ang pagpabakuna batok COVID-19.
RadyoMaN Kirby Manzon
