Indi pa handa sa subong ang South Cotabato agud nga halugan ang ginapatuman nga polisiya tungod sa paandam sang coronavirus disease amo nga nadesisyunan nila sa Provincial Inter-Agency Task Force for COVID-19 suno kay Governor Reynaldo Tamayo Jr. nga palawigon pa tubtob sa Abril 30 ang ginapatuman nga enchanced community quarantine kag calibrated lockdown sa probinsya kag nakaalign man suno pa ini sa regionwide lockdown.
Samtang wala man sang pagbag-o sa nauna nga EO ang ginpaggwa nga panibag-o nga executive order ni Governor Tamayo kundi extension lamang suno pa.
Apang sa Biyernes nga adlaw suno sa gobernador magapatigayon sila sang pagsinapol upod ang mga negosyante kag mga local chief executives agud nga istoryahan kon kinahanglan na bala nga ibalik ang pipila ka mga economic activities sa probinsya kag hatagan sang work quarantine pass ang mga empleyado.
Ginpahayag man ni Governor Tamayo nga naistoryahan naman nila nga pahanugutan nga makasulod sa Koronadal ang mga residente nga halin sa iban nga banwa lakip na ang Lutayan kag Columbio nga wala sang iban maagyan kon kinahanglan gid ilabi na kon mamakal sang essentials goods ukon emergency sa pihak sang ginapatuman nga clustering sang syudad.
