TACLOBAN CITY – Unom nga pulis an namatay ngan siyam naman an samaran han magkamayada mis-encounter an mga kapulisan ngan kasundaluhan kakulop han alas 9 han aga.
Sumala kan PCSupt. Mariel Magaway, PNP Regional Director, nahinabo an insidente ha Sitio Lunod Brgy. San Roque, Sta. Rita, Samar.
Siring han opisyal, nagkamayada combat operation an Philippine Army 87th Infantry Batallion ha lugar tungod nga mayada mga armado nga grupo nga nakikit-an pero diri maaram an mga kasundaluhan nga an 805th Mobile Company han PNP Regional Mobile Force Battallion in nagkamayada gihapon minor combat operations ha nasabi nga lugar.
Nagkita an duha nga pwersa ngan didto na nagbalyuay hin bala hin pusil.
Ginkilala an mga namatay (Killed in action) in hira Police Officer (PO) 1 Phil J Rey Mendigo, PO1 Edwin P. Ebrado, PO1 Wyndell S. Noromor, PO1 Rowel Reyes, PO1 Julie Y. Escalo, ngan PO1 Julius R. Suarez.
Samaran naman hira (Wounded in action) PO1 Romulo Cordero, PO1 Elmer F. Pan, PO1 Chris Angelo A. Pialago, PO1 Jaime G. Galoy, PO1 Rey C. Barbosa, PO1 Jonel C. Gonzaga, PO1 Rommel Bagunas, PO1 Janmark K. Adones, ngan PO1 Roden T. Goden.
Basi ha report umabot ha 20 minutos an purugsilay.
Nagdudumara na hin kanya-kanya nga imbistigasyon han Philippine Army ngan PNP ha nahinabo nga insidente.
