Bukidnon – Gipaklaro sa 8th Infantry Batallion kon 8th IB, Philippine Army nga engkwentro ug dili ambush ang nahitabo sa Bulonay, Impasug-ong, Bukidnon dili pa lamang dugay.
Sa interview sa RMN Malaybalay ngadto kang 1LT. Erwin Bugarin, ang CMO ug tigpamaba sa 8th IB gibutyag niini nga kung tan-awon ang sitwasyon mas bentahan sa mga New People’s Army kon NPA tungod kay nakaplastar na kining daan sa kabukiran apan ang nahitabo sa mao nga dapit engkwentro kini sukwahi sa report sa kapulisan nga gi-ambush ang mga sundalo nga nagresulta sa pagkapatay sa usa ka miyembro sa NPA.
Gipasigarbo usab sa 8th IB nga bisan ug pabor sa mao nga grupo ang terrain apan dili usab dihado ang kasundaluhan ug dili basta-basta mapatumba sa mga terorista.
Sa karon padayon nga nagpahigayon ug combat operation ang kasundaluhan sa mao nga dapit isip kabahin sa ilang mandato ilabina ug giproklama ni Pangulong Rodrigo Duterte ang mga NPA isip mga terorista.
Nagpahimangno usab si Bugarin sa mga nagsuporta sa mao nga grupo.
