Gipatuman na usab sugod kagahapon ang enhanced community quarantine sa tibook probinsiya sa Lanao del Sur ug sa Marawi City.
Kini base sa gipirmahang joint executive order nila ni Lanao del Sur Governor Mamintal Adiong, Jr. ug Marawi City Mayor Majul Gandamra.
Nakit-an sa Task Force COVID-19 nga aduna pa gihapoy daghang mogawas ug mosulod sa lalawigan ug sa siyudad bisan nga gipatuman na ang community quarantine niadtong Martes.
Sa executive order number 002, series of 2020, gibawal na ang tanang biyahe nga pasulod ug pagawas sa probinsiya sa tanang bisan kinsa lakip na mga residente.
Tungod niini, gihatagan ang tanang mga residente sa Lanao del Sur og 48 oras o hangtud karong adlawa nga maka-uli pa sa ilang tagsa-tagsa ka mga lugar sa probinsiya o kaha sa Marawi nga naa pa karon sa gawas.
Exempted lamang sa enhanced community quarantine ang mga pulis, sundalo, mga medical doctors, mga health and emergency frontliners, humanitarian aid ug medical missions ug uban pa’ng susama kanila.
Magpabilin ang enhanced community quarantine sa lalawigan hangtud sa Abril 14, gawas lang kung bakwi-on kini’g sayo o kaha palapdan pa.
Kung kahinumduman nga taga-Lanao del Sur ang usa ka nagpositibo sa COVID-19 kinsa namatay niadtong Martes sa usa ka tambalanan sa Marawi.
Ang unang natala’ng COVID-19 fatility sa Mindanao, nga namatay sa usa ka hospital sa Cagayan de Oro City gikan usab sa Lanao del Sur. (Divina M. Suson, March 20)
