ESTRIKTONG gipatuman sa gihapon sa tanang agi-anan o lutsanan sa probinsya sa Bukidnon ang Executive Order No. 35, series 2020 ni Provincial Governor Jose Ma. R. Zubiri, Jr., pinitsahan Agosto 18, 2020 sa tinguha nga dili makasulod ang mga buhing baboy, karne sa baboy ug mga produkto nga gama sa karneng baboy aron mapabilin nga luwas ang probinsya gikan sa African Swine Fever (ASF).
Sa report ni Dr. Cesar Guttierez sa Provincial Veterinary Office sa gipahigayong 4th Quarterly Meeting sa Provincial Disaster Risk Reduction and Management Council niadtong Disyembre 9, 2020, gipadangat niini sa mga mitambong nga gipangunahan ni Acting Governor Rogelio N. Quiňo, nga gikan sa onse (11) ka mga natukod nga Provincial Veterinary Sanitation Checkpoints (PVSC), nahimo na kining trese (13) [PVSC sa Alae, Piligayon, ug Mantibugao sa Manolo Fortich; Nicdao, Baungon; Gango, Libona; Sta. Inez, Malitbog; San Isidro, Talakag; Lorega, Kitaotao; Omonay, Damulog; Pamotolon, Kalilangan; Bonacao, San Fernando; ug ang duha nga nadugang sa Cabalantian, Kitatao ug Sitio Forchacu, Malinao, Kalilangan] sa tumong nga mabutangan gayud ug checkpoint ang tanang entry points sa Bukidnon.
Giklaro ni Dr. Guttierez nga lakip sa guidili sa maong Executive Order No. 35 ang online selling sa pork ug pork products sama sa chorizo, longganisa, ham, hotdog, ingon man ang mga canned goods ug uban pa.
Gibutyag usab ni Provincial Veterinarian Dr. Nancy Diez nga daghan na sa mga susamang produkto nga nanganlan sa unahan, lakip sa lechon nga baboy ang nakumpiska diha sa mga Quarantinas ug ang kasagaran niini gitambagan nga ibalik kung aha man nagikan (Return to Origin) ang maong mga produkto.
Mapasalamaton si Dra. Diez ngadto sa Northern Mindanao Hog Growers Association sa pag-abag sa kampanya sa probinsya batok sa ASF pinaagi sa pag-abaga sa suhulan ug honorarium sa pipila sa mga nakabantay nga 24/7 sa checkpoints sa Forchacu ug Cabalantian. Gihangyo usab sa Provincial Veterinarian nga likayan gayud ang pagbahug sa lamaw sa mga gi-alimahang baboy, ug kung maka-agi sa mga Quarantinas kinahanglan gayud nga motunob sa footbath.
Nasayran nga pipila na sa mga silingang syudad ug probinsya sa Bukidnon ang nakatala na sa kaso sa ASF, sama sa Iligan, Cotabato, ug Davao del Sur.
Ang ASF, usa ka makatakod ug makamatay nga sakit sa hayopang baboy nga hangtud karon wala paý nakaplagang bakuna busa gikinahanglan ang kooperasyon sa matag usa. Kung adunay mahibal-an nga kamatay sa baboy sa inyong lugar, mamahimo nga i-report kini sa Provincial Veterinary Office o ba kaha sa inyong City/Municipal Veterinary Office.
