Ginklaro han Philippine National Police Region 8 nga diri kinahanglan hiton PNP dinhi ha aton dapit hi controversial Ozamis City Police Head hi Chief Insp. Jovie Espenido para poypoyon iton Private Armed Groups ha Probinsya han Samar.
Mahihinumduman nga una nga nagserbe hi Espenido ha pira nga bungto han Samar ngan naasign ha Albuera, Leyte kun diin nabuwag an sindikato han illegal nga droga han mga Espinosa ngan mga myembro hini nga napatay durante han legitimate police operations.
Sumala kan PCSupt. Gilberto Cruz, determinado hiya kumo bag-o nga namamangulo han PNP ha rehiyon nga puypoyon ini nga armado nga grupo partikular ha syahan nga distrito han Samar ngan ha Calbayog.
Kapot na daw niya an listahan han mga myembro hini.
Mahugot naman an pag validate kun ginpoprotektahan ba ini hin pira nga politiko ngan law enforcement agencies.
Ini nga Private Armed Groups ha Samar in gintututuuhan responsible han mga pamatay ha pira nga politiko ngan personalidad ha Samar partikular na dida han nakalabay nga eleksyon.
