ILOILO CITY – Acting City Mayor Jose Espinosa III magapagwa sang memorandum nga nagapahibalo nga naga-execute na sya sang full-functions sang Mayor sang syudad.
Magapagwa sang memorandum circular si acting city mayor Jose Espinosa III nga naga-assume na siya sang full function sang mayor lakip na ang control kag supervision sang pulis santo sa probisyon sang kasuguan.
Ini nga tikang ni Espinosa kasunod sang padayun nga indefinite leave of absence ni Mayor Jed Patrick Mabilog.
Ginsiling ni Espinosa nga ini ngta memorandum circular magapahibalo sa mga government agencies, department heads kag kapulisan nga ginadumalahan na niya ang syudad suno sa kasuguan nga napagkit sa local government code.
Indi naman magpadala pa sang sulat si Espinosa sa National Police Commission angut sa iya pag-asumer sang kontrol kag superbisyon sa pulis.
Sa nahibaluan ang NAPOLCOM ang nagahatag sang otoridad sa mga local chief executives angut sa ila otoridad sa kapulisan.
Matandaan nga ginkakasan sang supervision kag control sang pulis si Mayor Jed Patrick Mabilog matapos ginmitlang sya ni President Rodrigo Duterte nga may kahilabtanan sa illegal nga droga sa syudad.
Sa karon masulod na sa duha ka bulan nga on-leave si Mabilog gani bangud sang temporary vacancy, nag-assumer na sang position bilang full-pledge acting city mayor si Espinosa.
Ara karon sa luwas sang pungsod ang alkalde kag nagapabulong sang iya sakit nga diabetes. Ginpahayag man sang asawa sang alkalde nga si Marivic Mabilog nga nagbiya sila sa syudad agud maamligan ang ila siguridad.
