Gilungkab ang establisyemento sa J&T Express Maramag branch diin mukabat sa P336,665.00 ang nadagit sa tulisan adtong milabayng Sabado didto sa South Poblacion, Maramag, Bukidnon.
Basi sa taho sa kapulisan, mireport ang Manager sa maong tindahan mahitungod sa maong pagpanlungkab ug nasuta pinaagi sa CCTV footage nga ang Security Guard sa Warehouse sa maong establisymento ang gituohang suspetsado.
Gi-operasyonan gilayon sa kapulisan ang maong Warehouse nga nahimutang 300 meters ang distansiya sa maong branch diin miresulta sa pagkasikop sa suspetsado nga giila nga si Albert Villarosa, 36 anyos, minyo, Security Guard sa maong Warehouse, ug mulopyo sa purok-7, Kalagutay, Base Camp sa naasoy nga lungsod ang kinsa nailhan pinaagi sa tattoo sa iyang wala nga kamot.
Gibalhog na sa Maramag Municipal Police Station ang suspetsado ug padayon ang imbestigasyon sa kapulisan alang sa pagrekober sa mga nakuhang kantidad sa kwarta.
