Davao City – Mireklamo sa Tugbok PNP ang duha ka managsuong dalagang estudyante tungod kay ginabaklad kun maligo ug ginakawat ang ilang mga panty nga hinay-hay.
Sa blotter sa kapulisan, nagpatabang ang managsuong dalaga nga si alyas Lalay, 20 anyos, ug alyas Gie gie, 17 anyos, nagpuyo sa Barangay Tugbok Proper Davao City human gisilip sa ilang silingan nga si alyas Jethro, 25 anyos, ulitawo, samtang naligo sa banyo alas 3:00 sa hapon.
Natingala ang mga biktima nga matag kaligo mukanaas ang bongbong nga sin sa ilang banyo ug ilang nasuta nga ilang silingang ulitawo maoy nagapanglili.
Gidugang usab sa mga biktima nga kalas kaayo silag panty kay mangawala kini human nga ilang ibulad sa hayhayan human og kaligo.
Nagduda ang mga biktima nga ang suspek ra usab ang maoy nagapangawat sa ilang panty kay kanunay kining magbahis-bahis tungod sa ilang hayhayan sa mga nilabhan.
Gitambagan sa mga pulis ang mga biktima nga ipatawag sa barangay ang suspek ug mga ginikanan aron didto husayon ang ilang reklamo.
RadyoMaN Erin Lumosbog
