Dead on arrival sa ospital ang driver sang motorsiklo sa nagluntad nga disgrasya sa dalanon sa National Highway, Prk. San Miguel, Brgy. Paraiso, Koronadal City, alas 6:35 kagab-i, Hunyo 27, 2021.
Ginkilala ang biktima kay Victor Kenith A. Espallardo, Junior High School Student kag residente sang Prk. Twin River West, Brgy. Sto. Niño, Koronadal City.
Imbolbado nga mga salakyan sa nasambit nga insidente ang isa ka Multicab bilang V1, color orange, wala sang plate number nga ang driver ang nagpalagyo kag isa ka unit sang Honda XRM 125 motorcycle bilang V2 nga ginamaneho sang biktima.
Sa imbestigasyon sang traffic section sang Koronadal CPS, ang multicab ang padulong sa banwa sang Banga, samtang ang motorsiklo ang yara sa opposite direction, apang pag-abot sa natabuan sang insidente nag-overtake ang biktima sa isa ka motorsiklo rason nga nasugata sini ang multicab nga nangin tunaan sang head on collision.
May-angot sini, ang driver sang motorsiklo ang nakaangkon sang seryoso nga pilas nga gindala sa South Cotabato Provincial Hospital, Koronadal City , apang gindeklarar nga patay alas 7:00 sang gab-i sang attending physician.
Sa subong ang duha ka mga salakyan ang yara sa Koronadal CPS Traffic Section.
