Salug, Zamboanga del Norte – WALA nilampos sa iyang dautan nga tuyo ang usa ka lalaki nga gikaigong lango sa ilimnong makahubog human nisukol ang estudyanteng dalaga gisulayan niini’g lugos sa miaging adlaw alas 7:40 sa gabii didto sa dalan sa Barangay Poblacion West, lungsod sa Salug sakop ning lalawigan.
Nakapangayo’g tabang sa Salug Municipal Police Station, ang dalagang biktima nga gitago sa pangalan Shara, 19 anyos, usa ka second year college student ug lumulupyo sa susamang dapit.
Si Police Chief Inspector Vedasto Dasmariñas III hepe sa Salug pnp nibutyag sa Interview sa rmn dxdr nga ang biktima naginosara niadtong higayuna paingon na pauli gikan sa eskwelahan apan pagabot sa ngiob nga dalan, gi-atgan kini sa lalaki nga naila usa ka Raymond Callao Alvarado Alias “Laboy” 19 anyos, dunay kapuyo ug mulupyo sa susama nga dapit, kon diin gisampongan ang baba ug gibaharan nga luba-on kon mosingit.
Giingong gigakos ug gidat-ogan gidayon niini ang lawas sa dalaga apan nilugnot kini ug natulod ang hubog nga suspek ug gidakol sa cellphone ang ulo hinungdan nga nakalingkawas ug nakasingit dayon midagan paingon sa buhatan sa kapolisan.
Sa pagresponde sa mga polis sa dapit nahitaboan malamposon nadakpan ang suspek nga nagkalapok pa ang short ug narekober sab ang cellphone sa biktima.
Sumala pa sa Hepe nga ila pang gisubay ang record sa ilang buhatan kon duna bay natala sa pagkalambigit sa ginadiling droga ang suspek.
Kagulkol karon sa prisohan ang dinakpan ug giduso na ngadto sa buhatan sa Women and Children Protection Desk (WCPD) sa Salug MPS ang maong insidente alang sa tukmang pagpasaka ug kaso. (-r.m-)
