Sa interview sa DXDC RMN Davao kang PSSg. Ronelyn Gomez, ang Chief Investigator sa Matanao Municipal Police Station, iyang giila ang biktima nga mao ang 18 anyos nga estudyanteng si Geoff Koby Yamid.
Sa imbestigasyon, sumala pa sa mga nasaksi nga nakiglumba kinig motor sa iyang kauban, giingong nag-superman ug mi-overtake sa usa ka payong-payong nga naglawig sab sa dalan ug mibangga sa usa ka motorista kinsa nakaangkon sab og minor injuries.
“Positive to nga naglumba na sila duha ka motor. Mao tong daghang nakakita nga nag-superman na siya nya mi-overtake sa payong-payong. Katong iyang kalumba wala na mi-overtake, kana lang siya,” butyag pa sa imbestigador.
Gawas sa gipakusgang checkpoint sa Matanao MPS ilabi na sa pagsuot og helmet, buot sa kapulisan nga mapakgang na ang mga drag race sa lugar aron wala nay kinabuhi pa ang makalas.
“Kanang dugay na pud namo nga problema, kanang mga batan-on nga malambigit pud anang drag race. Amoa pud pahimangno diha sa publiko nga kung ila gyud na ipadayon, dili gyud nila putlon, anihon ra gihapon na nila pag-abot sa panahon,” dugang pahimangno sa pulis.
RadyoMaN Ivy Parido
