TACLOBAN CITY – Gin-ambush han diri pa makilal-an nga mga suspek an Former Mayor han San Jose De Buan, Samar kanina han aga.
Samaran hi Former Mayor Ananias Rebato, 57 anyos, samtang an bodyguard hini in namatay matapos pauranan hira han bala han mga suspek.
Basi ha impormasyon, mabalik pagdalagan pagka-Mayor hi Rebato yana nga tikaarabot nga Election 2019.
Nakagpabuto pa hin pusil han bodyguard ni Rebato ngan namatay an usa ha upat nga suspek.
Sumala ha San Jose De Buan PNP, tipasakay na unta ha ira behikulo an Former Mayor ngan bodyguard hini han tigda la magpabuto an mga suspek.
Umatinder daw hin fiesta ha usa nga barangay hi Rebato.
Naangkon ni Rebato an mgakadurudilain nga igo hin pusil ha iya lawas ngan igindara ha usa nga hospital ha Tacloban City.
Samtang, nadakop naman han mga kapulisan an usa pa nga suspek, ha pagka-yana, waray pa ini pangilal-an.
Apil gihapon ha pagdudumaraon nga imbistigasyon han pulisya kun ano an motibo han mga suspek hini nga krimen.
