TACLOBAN CITY – Nagdumara hin surprise random drug test an Tacloban City Government kaupod an Philippine Drug Enforcement Agency (PDEA) ha mga empleyado han City Hall.
Dida han Lunes, 50 nga mga empleyado an nakatalaan nga igpa-drug test pero 46 nala an napailarom tungod nga an duduha in umabsent, usa an nagkasakit ngan usa an nagretire na.
Sumala kan Dra. Gloria Fabrigas, Head of the Special Projects for Health han City Government, ika-duha na ini nga random drug testing nga ira ginbuhat ha mga empleyado han City Hall.
“So far,second round ini, the first one I think we conducted early or mid of this year 100 employees yung nadrug-test natin and last monday is 50 pero 46 lang yung subject for drug testing.”
Sobra 2,000 an mga empleyado han Tacloban City Hall pero dugang ha pamahayag ni Dra. Fabrigas, randomly nga ginpipili an mga empleyado kun hin-o an mapapailarom ha drug test.
Negative an resulta han 46 nga napailarom ha drug test.
Mayada man gud ginpalusad nga memorandum hi Tacloban City Mayor Cristina Romualdez nga kinahanglan tanan nga empleyado han City Hall in mapapailarom hini.
Magdudumara pa hin surprise random drug testing an Tacloban City Government ha mga masunod nga adlaw para mabaruan an sobra 2,000 nga empleyado kun positibo ha droga o diri.
(Photo by Tacloban City Information Office)
