TACLOBAN CITY – Iginbilin han diri pa makilal-an nga tawo an usa nga baby ha Abucay New Bus Terminal han Tacloban dida han Sabado.
Usa nga lalaki an nagturn-over hini nga baby ha Tacloban City Police Station-2.
Ha pakipaghimangraw han RMN ha Tacloban City Social Welfare and Development Office (CSWDO), kakulop han aga han igturn-over han mga kapulisan an baby ha ira.
Sumala kan Carmela Vasquez, Center Head han Women and Children Shelter han CSWDO, baby boy ini nga ginbayaan ha new bus terminal.
“Nakaputos la ini hin lampin ngan dida nakabutang han lingkuran han terminal.”
2-3 months an pangidaron hini nga baby. Basi han impormasyon, usa daw nga babayi nga may upod nga bata an nagbilin hini nga baby ha waiting area han terminal.
Sumala han CSWDO, yana nga ada na ha ira poder an baby makukurian na pagkuha an kag-anak hini ha ira.
Pwede pa mapasakahan hin kaso an kag-anak hini tungod han pagpabaya.
Dugang ha pamahayag ni Vasquez, healthy hi baby boy.
“Healthy ini nga baby, baadaw kay maupay nga nadede.”
Panawagan naman han CSWDO ha mga kag-anak hini nga baby.
“Kun hin-o man it kag-anak hini nga bata sana makonsensya ka nga ini nga imo anak tawo man ini unta, diri unta ginbabayaan hin sugad.”
“Kay kun nadiri ka pagbuhi tim anak pwede ka dumaop ha social welfare para mabuligan ka namon unta.”
