EXCLUSIVE: Pabalay han NHA ha Tacloban waray pa Certificate of Occupancy pero gin-uukyan na

543

TACLOBAN CITY – Gin-uukyan na an pira nga mga pabalay han mga biktima han Supertyphoon Yolanda ha Northern Barangay nga dapit ha Tacloban pero ha nakuha nga impormasyon han RMN Tacloban waray pa ngayan igturn over han contractor ha National Housing Authority o kun NHA ini nga mga pabalay ngan waray pa liwat igturn over han NHA ha Tacloban City Government.

Gin uukyan naman ngani ini pero waray pa maghatag hin Certificate of Occupancy an Tacloban City Hall.


Ha eksklusibo nga interview han RMN kan Ted Jopson, Officer-in-charge han City Housing, tumugot nala an Tacloban City Government nga pangukyan ini for ‘humanitarian reason’ na sinisiring bis pa man waray pa magdumara hin inspeksyon an mga tinaglawas han Syudad ha mga pabalay. An problema kun dilikado ini ukyan ngan substandard an gingamit hini nga mga materyales.

“That’s why an ginhimo for the sake of humanitarian reason an city liwat tumugot nala ipa-move an mga tawo. Technically, an responsibility man gud hito between the developer and NHA because how can we accept yung mga units kun waray pa ini ka-inspeksyon kay bangin may mahitabo dida kami it babasulon.”

Sidngon pa ni Jopson nga ginpakita han mga contractor o developer ha NHA nga may mga available na nga unit nga pwede na ukyan bis pa man waray pa kasiguraduhan kun resilient ini nga mga pabalay.

Dugang ni Jopson, gintagan han NHA hin checklist an mga yolanda victims nga maukoy ha mga units kun ano pa iton kulang ngan magdudumara hin mitigation an buhatan (NHA).



Nagdumara na liwat hin inspeksyon an National Economic and Development Authority o kun NEDA ngan iginpasabot ini ha City Housing.

Siring ni Jopson, damo iton cracks ha mga pabalay ngan substandard iton septic tank.


“Kun kitaon an total report han NEDA, an quality may mga cracks, substandard an septic tank. Dapat unta separate an storm drainage, an septic tank diri kay uusa la. Damo an findings kay kun igsiring ko la an iba pa nga findings katakot-takot an findings.”

Upat na katuig an nakalabay han Bagyong Yolanda an araba la gihapon han mga biktima han bagyo an substandard nga pabalay nga sumala ha ira diri la gihapon naaaksyunan han gobyerno.

Facebook Comments