Sarangani Province–Malampuson nga natigayon sa probinsya sa Sarangani ang unilateral training exercise sa Philippine Navy, Philippine Marines og mga reservist gitawag nga Exercise Pagsasama 2018. Gipakita sa Naval Special Operations Unit ang capability demo nga maoy nag-clearing sa baybayong bahin una nikanaog sa mga barko ang mga active regular force og reservist sa Philippine Navy og Philippine Marines aron sudlon ang scenario target area duyog ang helicopter sa kawanangan. Nadunggan pa ang boto-boto sa mga armas og pagbusikad.
Lima (5) ka mga dagkong barko, mga gunship, ang gigamit sa maong training nag-una niini ang pinakadako nga landing craft unit sa Philippine Navy nga mao ang LD-601 naila sa tawag nga BRP Tarlac, pwede kining mukarga og tulo (3) kabuok naval helicopter.
Human sa training exercise, nagpahigayon gayud dayon og civic action program sulod sa barangay hall sa Tuyan, Malapatan sa pag-ayuda sa Provincial Health Office. Libreng nakaangkon ang mga residente og medical og dental check up, operation tuli, feeding program, Tutok Buntis prenatal services sa mga mabdos, Philheath card sa mga buntis, og may libre pang gupit.
Gikalipay na lamang ni Governor Steve Chiongbian Solon ang natigayon nga Exercise Pagsasama 2018 sa Sarangani Province aron mapakusgan pa ang pagbantay sa seguridad sa Sarangani Bay. Si Governor Solon ang may ranggo nga lieutenant colonel sa Philippine Marine Reservist.
